حج کے لیے اب تک ایک لاکھ چالیس ہزار سے زائد پاسپورٹس کی تصدیق مکمل
حج 2027 کی تیاریوں کے سلسلے میں اہم پیش رفت سامنے آئی ہے۔ حکام کے مطابق اب تک 140,919 عازمین حج کے پاسپورٹس کی جانچ پڑتال مکمل ہو چکی ہے۔ دوسری جانب رجسٹریشن کروانے والوں کی مجموعی تعداد تقریباً چار لاکھ تک پہنچ چکی ہے، تاہم آگے کا مرحلہ صرف اُن ہی عازمین کے لیے شروع کیا جائے گا جن کے پاسپورٹ کی تصدیق باقاعدہ طور پر ہو چکی ہو گی۔
پاسپورٹ رسید یا ٹوکن پر انحصار نہ کریں
واضح رہے کہ پاسپورٹ کی محض رسید یا ٹوکن دکھانا کافی نہیں سمجھا جائے گا۔ اگلے مرحلے کے لیے اصل پاسپورٹ کی تصدیق لازمی شرط ہے، اس لیے عازمین کو چاہیے کہ وہ اس معاملے کو سنجیدگی سے لیں۔
پاسپورٹ کے منتظر عازمین کے لیے مشورہ
جن افراد نے نیا پاسپورٹ بنوانے کے لیے درخواست جمع کروا رکھی ہے، انہیں مشورہ دیا جاتا ہے کہ اگر ممکن ہو تو اپنی درخواست کو ارجنٹ کیٹیگری میں تبدیل کروا لیں۔ اس طرح پاسپورٹ جلد مل سکے گا اور تصدیق کا مرحلہ بھی بروقت مکمل ہو سکے گا۔ یاد رہے کہ جب تک پاسپورٹ کی تصدیق نہیں ہوتی، اگلا کوئی مرحلہ شروع نہیں کیا جا سکے گا — لہٰذا تمام درخواست گزاروں سے گزارش ہے کہ وہ اپنے پاسپورٹ کا معاملہ ہر ممکن جلدی نمٹائیں۔
یہ بھی پڑھیں
بی آئی ایس پی ڈیجیٹل والٹ حفاظتی ہدایات: خواتین مستحقین اپنی رقم کیسے محفوظ رکھیں
رجسٹریشن کا آغاز اور اہم شرط
18 اگست سے حج 2027 کی باقاعدہ رجسٹریشن کا سلسلہ بینکوں کے ساتھ ساتھ آن لائن پلیٹ فارم پر بھی شروع ہو چکا ہے۔ وزارتِ مذہبی امور نے واضح کیا ہے کہ سرکاری حج اسکیم کے تحت درخواست جمع کروانے کا اہل صرف وہی افراد ہوں گے جو پہلے سے رجسٹرڈ ہو چکے ہیں۔